Zweiti Wuchä in Finnland

Hallöchen!

Scho zwei Wuchä bini jez in Finnland. D'Uni het immer nonig agfange. Morn hani s'erst mal dä Finnisch Kurs aber sust fanged mini Vorlesige erst i 1-2 Wuchä oder no spöter a.
Es gfallt mir immerno super da. Will mir no kei Uni hend, hemer nöd so viel z'tue und gönd däfür umso meh in Usgang. Die andere sind ja all viel jünger und ich bi glaub die einzig, wo jetzt langsam ä Pause brucht:-)!

Ich ha jetzt endli es Velo. Nur für 2-3 Wuchä, aber immerhin. Has vom Kuba (Tschech) übercho, will er für Prüfige zrug uf Prag het müssä und öper gsuecht het zums Velo babysitte, will da d'Velos zimli schnell klaut werded, wemers umä sta laht. Has au scho ustestet zum in Usgang ga. Leider gheit d'Ketti all paar 100 Meter usä, wemer nöd im Schnecketempo fahrt, aber es isch besser als nüt und es gseht suuuper cool us:-)!

Am Dunstig simer s'erst mal is Onnela, das isch en Club im Zentrum vo Turku wo über zwei Stöck gaht und no ä grossi Ussä-Bar het. Da in Finnland isch ja s'Rauche nur dussä erlaubt, was würkli sehr agnehm isch. Däfür ischs je spöter dä abig, desto lüüter dussä.
Gester bin ich s'erst mal amne Samstig Abig in Turku unterwegs gsi und ich glaub ich ha i mim Lebe no nie so viel betrunkeni Lüt uf eim Huufe gse. Die einte hend nüm chönä sta und sind am Bode glege, die andere sind idä Underhose umä grennt oder hend umägröölet. Isch jedefalls interessant und amüsant gsi:-)! Teilwis ischs aber au eher chli tragisch was mär so gseht. So ischs da eigentli normal, dasmer am Wuchänänd scho am Mittag betrunkeni Teenies idä ganze Stadt gseht umälungere. Die probiered nödmal, das als Picknick ztarne, aber ich glaub nöd dass es die restliche Finne interessiert. Ich bi mit zwei vo mine Nachbare gester und paar anderne Ustuschstudente anes Konzert im Klubi (schönä Name für en Club:-)). Ä finnischi Band het gspielt. Isch super gsi! D'Vorband isch au lustig gsi. So en finnische Entertainer wo mir leider nöd verstande hend, aber wo irgend welchi Liedli gsunge het uf finnisch und so Engels-Flügeli agha het. Mir hend zwar keis Wort verstande, aber es isch lustig gsi. Ha denn au no dä erst Schwiizer troffe sit ich da bin. Inere Chuchi i oisem Nachbarhus. Ich hans fast nöd chönä glaube, dass ich doch no öper triff wo Schwizerdütsch redet und es isch recht komisch gsi, mal nöd englisch oder dütsch zrede.

Gester simer au no inere Stadt chli nördlich vo Turku gsi. Naantali. Isch vor allem berühmt für dä Mumins-Park. Dä hetti 20 Euros kostet, drum simer eifach det an Strand und d'Altstadt go aluege. Es isch schön gsi, aber sehr touristisch gsi und vor allem simer mit öpä 15 Lüt unterwegs gsi, was mit dä Zit ä chli astrenged worde isch. Mir sind au wieder amne Strand gsi det, aber das mal bin ich nöd go bade.

Hüt gani no zudä Irene mit ihre und ihrne Kollege go Film luege. Sie isch au wieder mit ois in Usgang cho am Dunstig und sie isch eifach die best. Han also würkli Glück gha, dasi sie als Tutorin ha. Die meiste andere hend so typischi, verschlossni und ruhigi Finnine, wo jetzt eigentli kei Kontakt me zu ihne sueched. Ohne d'Irene würdi wahrschinli au chum Finne kennelerne.
I oisem Stock wohned irgendwie immer nonig meh Lüt. D.h. ich ha vom Manu, mim direkte Nachbar ghört, dass en Tschech, en Türk, en Spanier, ä Südafrikanerin und ä Amerikanerin izoge sind, aber gse han ich die no nie. Mir glaubed aber langsam, dass irgendöper vo däne das riese Puff idä Chuchi verastaltet. Es isch würkli chli grenzwertig, will die dreckige Pfanne und Teller glaub bald afanged lebe und selber us dä Chuchi dävo laufed:-). ich choch drum eher selte da und iss am Abig immer nur Chäsbrötli oder sust öpis kalts.

Ich freu mi scho uf dä Finnisch-Kurs morn. Bis jetzt chan ich ja nur Hallo, Tschüss, Danke und paar Schimpfwörter vo dä Irene.
Ich probier mal no es Filmli vo dem komische finnische Entertainer vo gester ufä zlade, aber bezwiefle, dass ich das schaffe:-)!

Hei hei us Turku!