Helsinki

Hyvää yötä!
das wuchänänd simer mit 14 lüt uf helsinki gfahre. nachdem mir am morge am 9i dä zu gno hend, simer kurz vorem 11i idä hauptstadt vo finnland acho.
ich bin ja letzt jahr scho mit dä christina und nadina det gsi und ha gwüsst dass es nöd sooo viel zgse git. aber es het mir trotzdem gfalle. dä finnischi baustil isch nöd bsunders sehenswert, aber dä märtplatz direkt am hafe, ä chile wo im fels baue isch (dä finnisch name chani mir nöd merke) und dä wissi dom sind sehenswert. mir sind am afang öpä 20 lüt gsi, was eidütig zviel gsi isch. nachere stund hemer ois denn aber ufteilt und sind "nur" no z12. unterwegs gsi, will en teil vodä gruppe am abig zrug uf turku isch. nachdem mir oises züg idä jugi (im olympiastadion) abglade hend, simer all wichtige sehenswürdigkeite go abklappere, wobi es paar vo ois (inkl. ich) mit dä zit ä chli ungeduldig (will hungrig) worde sind. aber zum glück gits ja in helsinki nöd soo viel zgse, so dasmer am 4i denn au mal no hend chönä zmittag esse.
am abig simer en film vom filmfestival go luege. es isch en estische film gsi mit englische untertitel. estisch und finnisch sind verwandti sprache und so hani immerhin d'zahle verstande. die hani sit dä polizeiauktion vodä velos letzt wuchä intus:-). dä film isch "intressant" gsi. d'schauspieler hend nöd grad ä glanz leistig erbracht, wasi au gmerkt ha, ohni dasi es wort verstande ha. und ich bi paar mal fast igschlafe. nacher simer all so müäd gsi, dasmer nur no eis sind go zie und denn am 12i id jugi zrug sind.
hüt ischs a...kalt gsi. es het gwindet und womer als ersts uf en ussichtsturm im olympia-park sind, hets ois fast weg gwindet. nacher simer idä nöchi no s'sibelingdenkmal go aluege und denn hemer scho so kalt gha, dass ich und 3 anderi kei lust me gha hend uf suomenlinna (oder so ähnlich) ä insle idä nöchi zfahre. ich bi scho sitem fritig mit halsweh und neuerdings mit hueste am kämpfe, so dasi nöd ha wele no ä lungeentzündig ifange. zvierte simer drum is museum für moderni kunst, während die andere uf d'insle sind. det gani denn es andersmal sicher au no hi, aber wenns wetter mit spielt.
im museum isch zufällig grad ä usstellig vodä pipilotti rist gsi. dä rest vom museum het ois mässig gfalle aber d'pipilottirist isch super gsi. mir hend müssä d'schuäh abzieh und sind denn inen grosse rum mit videoinstallation und musig cho womer het chönä am bode ligge und es mittagsschlöfli mache:-)! aschlüssend simer ois imne restaurant go vollfresse womer für 9.5 euro cha so viel esse wie mär wott. pizza, chickenwings, lasagne, natürli härdöpfelgratin, salat, glace... es isch also en perfekte tag gsi:-)!
am 6i simer wieder in turku gsi. da het leider d'ufzgi für morn uf mich gwartet. ich ha en online-kurs woni ab und zue kurzi ufsätz muss abgä, was für mich im moment no ä usäforderig isch uf englisch, aber es chunt langsam... die wuchä hani serst mal chli meh uni. morn hani sage und schreibe 6 lektione und alli am stuck. aber sust ischs immerno zimli locker. au vom stoff her ischs bisher viel eifacher als in züri.
die wuchä hani leider mis velo müssä zrug gä. dä kuba isch us prag zrug cho. ha bis jetzt no keis neus gfunde, aber bi mir nüm so sicher obi no eis wott, wills inzwüsche doch recht kühl worde isch.
i oisem korridor isch langsam aber sicher lebe ikehrt. dä pedro, en spanier wo neu da wohnt und sis zimmer direkt nebed dä chuchi het, het sini zimmertür immer offe und luti musig a, womit viel me lüt id kuchi chömed, wills sgfühl hend es seg öpis los. so laht sichs guet da lebe. min türkische kolleg koray het isch au langsm chli gmacht. er kocht jetzt sogar ab und zue und wäscht vo zit zu zit ab:-)! usserdem glaubi ischer mängisch so komisch, willer eifach nöd guet englisch chan. mir hend zumindest immer öpis zlache wenn er id chuchi chunt. morn chochemer wieder all zäme. nachdem ich letzt mäntig rösti gmacht han, isch dasmal dä ungar andras dra.
so jetzt musi no dä letzt ufsatz für morn schriebe.
liebi grüäss und nuku hyvin us turku
simone