Danzig und Mökki

Hyvää päivää!
Letzt Wuchänänd bini mit dä Justine und em Ondra uf Danzig in Polen gfloge. Es git Direktflüg vonere Billigfluglinie direkt vo Turku uf Danzig. Oises Hostel isch au super-günstig und direkt im Zentrum gsi.
Danzig isch ä wunderschöni Stadt und trotz schlechtem Wetter und massehaft Schneematsch (wo oisi Füäss innert wenige Stunde total durchnässt het) hets ois sehr guet gfalle. Es het wenig Lüt gha, will ja nöd grad die typischi Touriste-Saison isch... Mir hend die ganz Altstadt zfuess erkundet und sind au no miteme Regionalzug 20 Minute uf Sopot, d'Nachbarstadt, as Meer gfahre. Das het sich au uf jede Fall glohnt wills Meer nämli gfrohre gsi isch. Nöd so richtig wie in Turku, aber es isch so zähflüssigs Iiis gsi, wo nonig ganz härt isch und so öpis hend mir alli no nie gse!
Was hemer sust so gmacht i däre Stadt? Mir hend vor allem viel viel und günstig gässe. En riisige Teller miteme grosse Steak, Pommes und Salat für nur 6.5 Euro... s'Paradies für ois arme Studente in Finnland, wo ois nur Hackfleisch und Poulet chönd leiste:-).
s'Nachtlebe hemer eigentli au no wele erkunde, aber mir sind zimlich müäd gsi und denn nur eis go zieh. Idä Klubs hets nur komischi Lüt gha und usserdem langi Schlange. Im Hostel hemer denn no en gstörte, sturzbetrunkene Pol kenneglernt wo ois dä Schlaf graubt het mit sim Geschnarche, nacher sin Alarm von Natel nie ghört und am morge früh i einere Lutstärki telefoniert im 12er Zimmer. Sehr sozial...:-).
Nacher simer nur 2 Täg dihei gsi und am Mittwuch scho los fürs nächste Abentür. Mir hend es Mökki (Hüsli) gmietet will dä Emeline ihri Schwöster mitem Fründ da gsi isch und das unbedingt het wele. Super gueti Idee gsi! Mir sind z'8. gsi und s'Cottage in the middle of nowhere!!! Im tüfverschneite Lappland! Dä Bsitzer het keis Wort Englisch gredet aber dank Taxifahrer wo ois übersetzt het ischs denn gange. Mir hend selber Holzghacket und d'Sauna igheizt wo sich denn leider d'Ela am Ofä s'Bei heftig verbrennt het... Aber sust sinds perfekti Täg amne wunderschöne Ort gsi!!! Oises Hüsli het au en eigne See gha, wo natürli gfrohre gsi isch und gester simer dä ganz Tag go spaziere und im Schnee umä blödle. Sauna isch immernonig so min Fall, aber ich ha mi tapfer gschlage und bi au wieder in Schnee däzwüsche:-).
D'Ziit vergaht enorm schnell da obä im Moment. Viel z'schnell. Ich cha mir nonig vorstelle i nur 2.5 Wuchä wieder zrugg idä Schwiz z'si und all däne Lüt da in Turku müssä Tschüss z'säge... Im Moment verdräng ich das no aktiv, so dass ichs no cha gnüssä und nöd dauernd dra dänke, dasi bald zur flüge...
Liebi Grüäss usem immerno iisig kalte (-17°C) Turku
Simone

Lappland

Moikkaaa!
sit 3 wuchä bini wieder da in turku. d'ziit vergaht viel zschnell und i 5 wuchä chumi scho wieder hei.
ich han mich schnell wieder in turku iglebt und gnüss d'ziit mit dä lüt vom letzte semester wo immerno da sind. jez wo d'justine und emeline da wohned ischs endli wie richtig zäme wohne. mir choched fast jede tag öpä z'10 und sitzed lang zäme. mit parties hemers bis jetzt ä chli ruhiger aga la:-). mir sind all die erste 2 wuchä müäd und kaputt gsi und hend ois zerst wieder müssä ad kälti und dunkelheit gwöhne. d'dunkelheit isch jez aber nüm so schlimm. und dur dä viel schnee ischs viel heller. sit ich acho bin hets immer viel schnee da, was für turku und südfinnland eher untypisch isch. mir hend jez immer so 30-50cm gha.
zum endli mal richtig viel schnee zgse, simer denn aber letzt zistig uf lappland ufbroche. nach 16 stund im bus und 825km fahrt richtig norde simer in levi acho. levi lit ca 150km nördlich vom polarkreis und isch eine vodä beliebteste ski-ort in finnland. es het ein für finnland höche berg (ca 300 meter höch vom dorf us gse) und sogar ä piste für ski-weltcup renne.
in levi hemer i cottages gwohnt. ich bi mit dä meiste vo mine fründe imene grosse chalet für 10 lüt mit zwei stöck mit insgesamt 5 zweier-zimmer, chminee, zwei badzimmer und natürli sauna gsi. mit dä unterkunft hets also scho mal sehr guet agfange.
ich persönlich wer fast lieber inen chlinere ort wo denn meh idä "wildnis" gsi wer, aber dä vorteil a levi isch gsi, dass mär unglaublich viel het chönä unterne. schlittle, skifahre, hundeschlitte, snowmobil, langlaufe, schneeschuählaufe, spaziere etc...
ich bi 1 tag go ski-fahre, wobi das bi ca -25°C chli schwierig gsi isch. die meiste lüt da chönd nöd würkli skifahre aber ha zum glück 3 tscheche gfunde wo denn mit mir sind go fahre anstatt stämmbögli drehe und obwohl d'piste chli kurz gsi sind ischs danke perfekte pulver-schnee-verhältnis und regelmässige tee-pause super gsi!!!
aber mini highlights sind ganz klar snowmobil- und haski-safari gsi.
am dunstig simer mit dä snowmobiles 3 stund dur d'wildnis düüset. über gfrohrni see, dur wälder und wiiti ebene. d'snowmobiles sind jewils für 2 persone gsi und öpär het chönä fahre und dä ander isch hine druf gsesse und het sich zimli fest müssä hebe. da ich ja scho bim autofahre nöd grad es naturtalent bin und mär für im fall vomne unfall undme kaputte schneemobil bis zu 800euro hetti müssä zahle, hani zimli respekt gha. drum bini denn ufem hiweg bim ondra hinä druf gsesse. so hani d'landschaft no chönä gnüssä solangs no hell gsi isch. di vor ois sind eimal kippet aber sust isch nüt schlimmerst passiert. uf halbem weg hemer denn inere rentier farm halt gmacht zum ois bi tee chuächä ufzwärem. ufem rückweg hani ich denn mini angst überwunde und bi gfahre. das isch suuuuuuper gsi!!! ich bi letztlich sogar schneller gfahre als dä ondra und ha schnell kei angst me gha. eimal wäred mir fast kippet. s'stüre isch extrem astrenged, will mär mitem ganze körper id kurve muss inä ligge und wenn mär äs bitz vo dä spur abchunt und nur asatzwis in tüfschnee gratet, mär sofort kontrolle verlürt und kipped. das isch einige passiert, aber niemer het sis gfährt oder sich selber demoliert:-)! nach öpä 3/4 vodä strecki hemer müssä wechsle will mini wimpere so zugfrohre sind, dasi nüt me gse ha und mini linse agfange hend afrühre. aber es het uf jede fall spass gmacht und ich würs sofort nomal mache!
am nächste tag simer den ufä haski farm und go hundeschlitte fahre. ich ha ja eher angst vor hünd und dänkt mir sitzed denn im schlitte und öper vodä farm fahrt ois umä. aber nei, mir hend ois zzweite müssä ufstelle und öper het chönä in schlitte ligge und dä ander hinä druf sitze und fahre. da hani mir denn zerst fast id hose gmacht aber ich bi denn als ersts hinä druf gstande und gfahre und es het würkli spass gmacht! chum dasmer mitem fuess vodä brems isch, sind die hünd ab wie ä rakete:-)! isch zimli schwer gsi sie wieder zbremse. nach halbem weg hemer gwechslet und sind denn nach ca 200m prompt inen baum inä gfare, aber das het nüt gmacht und mir hend ois halb kaputt glached. d'haski-safari isch leider nur ca 20 minute gange aber es het sich uf all fäll glohnt!
am letzte abig simer denn no id sauna und d'svetlana und ich sind nacher direkt in schnee gumped. isch für min kreislauf nöd sbeste gsi im nachhinein aber het spass gmacht:-)!
die 4-5 täg lappland sind viel zschnell vergange. gester mittag simer wieder abgfahre und hüt morge am 6i in turku acho. da isch au alles wieder frisch verschneit.
ich freu mich uf mini 5 letzte wuchä in finnland.
übernächst wuchänänd gahni mit dä justine und em ondra uf danzig (polen) und idä wuchä druf mit es paarne ines cottage idä nöchi vo turku für 2 täg.
ä prüfig und zwei essays plus vorlesige hani au no, aber da ja d'uni da obä nöd grad ä würklichi herusforderig isch, sött das keis problem si.
das wärs also wieder gsi us finnland.
bis zum nächste mal
heippa!!!