Fairytale Party

Hallo!
scho wieder ä Wuchä verbi. leider bini ja sit em letzte fritig am kränkle. zerst halsweh, denn hueste, denn no meh halsweh mit hueste und sit gester jetzt au no verstopfti nase. nacher söttis denn hoffentli mal überstande ha. es erstunt mich ja nöd, dasi bi dem wetter verkältet bin. es isch meistens so um die 5-7 grad am tag und idä nacht gege 0°C. Und es isch erst afang oktober.
die wuchä hemer die legendäri fairytale party gha. det bini denn trotz verkältig anä, will d'justine und ich ois so es super kostüm usdänkt hend. für die party het mär sich als ä figur useme märli, comics oder film müässä verkleide. d'justine und ich sind als schlumpf gange! die blau farb im gsicht het zwar nöd mitem blau vodä leggins übereingstumme aber das het nüt gmacht, will mir sowieso gnueg ufgfalle sind und offesichtlich gsi isch, was mir wend darstelle:-)!
d'irene het aber dä vogel abgschosse als spongebob. sie isch dä mittelpunkt vodä party gsi und isch denn sogar international-student of the week worde, obwohl sie ja gar kein ustuschstudent isch:-)! d'emeline isch als cruella de vil gange, die bös frau i 101 dalmatiner und d'cassia (kanada) und dä koray (min komische türkische nachbar) sind ihri dalmatiner gsi:-)! es sind prise für die 6 beste kostüm vergä worde und emeline, irene und justine und ich hend all gwunä:-)! dä pris isch zwar "nur" es gratis-bier gsi, aber immerhin:-)!
ah ja und a dä party hend all ustusch-studente gratis ä vip-karte für dä club übercho, zum in zukunft immer gratis itritt zha. und für dä hemer müssä es föteli vor ort mache. uf dem bini jetzt also als schlumpf und ich bezwiefle ja, dass die mich det jemals wieder inä lönd ohni blaui farb im gsicht...




Billy Elliots us Spanie

Irene - Spongebob mit ihrer chline Schwöster

Emeline als Cruella devil


mini zwei spanische Nachbare Manu und Pedro und oisi "chuchi-ross"

Marine als Pippi Langstrumpf au mit oisem "chuchi-Ross"


links mini südafrikanisch Nachbarin Rachel. Ha leider nöd usägfune was d'Verkleidig söll si:-)

föteli vodä letzte zwei septemberwuchä in turku

letzt wuchä bini ad polizeiveloautkion. es velo hani keis gfunde aber amüsant isch es gsi. alles uf finnisch, aber jetzt chani wenigstens d'zahle bis über 100:-)!





damit ihr gsehnd wie die finnische studente umä laufed. zwei bsunders schöni exemplar vodä typische overals






idä gliche wuchä simer usserdem amne ishockey match gsi womer gratis billet übercho hend. turku gege espoo idä höchste liga vo finnland. s'spiel isch mässig spannend gsi, bis 5 spieler vo turku ufs mal nachere masse-schlägerei uf d'strafbank hend müssä:-)! sie hend aber trotzdem no gunä erstundlicher wis.









am dunstig het dä ondra geburtstag gha. mir hend i oisem hus im wohnheim aber im undere stock gfiiret.da gsehnder mal wies im studenteheim cha usgse wenns ä party git. ich bi froh, ischs nöd i minere kuchi gsi:-)!

Helsinki Föteli

Helsinki

Hyvää yötä!
das wuchänänd simer mit 14 lüt uf helsinki gfahre. nachdem mir am morge am 9i dä zu gno hend, simer kurz vorem 11i idä hauptstadt vo finnland acho.
ich bin ja letzt jahr scho mit dä christina und nadina det gsi und ha gwüsst dass es nöd sooo viel zgse git. aber es het mir trotzdem gfalle. dä finnischi baustil isch nöd bsunders sehenswert, aber dä märtplatz direkt am hafe, ä chile wo im fels baue isch (dä finnisch name chani mir nöd merke) und dä wissi dom sind sehenswert. mir sind am afang öpä 20 lüt gsi, was eidütig zviel gsi isch. nachere stund hemer ois denn aber ufteilt und sind "nur" no z12. unterwegs gsi, will en teil vodä gruppe am abig zrug uf turku isch. nachdem mir oises züg idä jugi (im olympiastadion) abglade hend, simer all wichtige sehenswürdigkeite go abklappere, wobi es paar vo ois (inkl. ich) mit dä zit ä chli ungeduldig (will hungrig) worde sind. aber zum glück gits ja in helsinki nöd soo viel zgse, so dasmer am 4i denn au mal no hend chönä zmittag esse.
am abig simer en film vom filmfestival go luege. es isch en estische film gsi mit englische untertitel. estisch und finnisch sind verwandti sprache und so hani immerhin d'zahle verstande. die hani sit dä polizeiauktion vodä velos letzt wuchä intus:-). dä film isch "intressant" gsi. d'schauspieler hend nöd grad ä glanz leistig erbracht, wasi au gmerkt ha, ohni dasi es wort verstande ha. und ich bi paar mal fast igschlafe. nacher simer all so müäd gsi, dasmer nur no eis sind go zie und denn am 12i id jugi zrug sind.
hüt ischs a...kalt gsi. es het gwindet und womer als ersts uf en ussichtsturm im olympia-park sind, hets ois fast weg gwindet. nacher simer idä nöchi no s'sibelingdenkmal go aluege und denn hemer scho so kalt gha, dass ich und 3 anderi kei lust me gha hend uf suomenlinna (oder so ähnlich) ä insle idä nöchi zfahre. ich bi scho sitem fritig mit halsweh und neuerdings mit hueste am kämpfe, so dasi nöd ha wele no ä lungeentzündig ifange. zvierte simer drum is museum für moderni kunst, während die andere uf d'insle sind. det gani denn es andersmal sicher au no hi, aber wenns wetter mit spielt.
im museum isch zufällig grad ä usstellig vodä pipilotti rist gsi. dä rest vom museum het ois mässig gfalle aber d'pipilottirist isch super gsi. mir hend müssä d'schuäh abzieh und sind denn inen grosse rum mit videoinstallation und musig cho womer het chönä am bode ligge und es mittagsschlöfli mache:-)! aschlüssend simer ois imne restaurant go vollfresse womer für 9.5 euro cha so viel esse wie mär wott. pizza, chickenwings, lasagne, natürli härdöpfelgratin, salat, glace... es isch also en perfekte tag gsi:-)!
am 6i simer wieder in turku gsi. da het leider d'ufzgi für morn uf mich gwartet. ich ha en online-kurs woni ab und zue kurzi ufsätz muss abgä, was für mich im moment no ä usäforderig isch uf englisch, aber es chunt langsam... die wuchä hani serst mal chli meh uni. morn hani sage und schreibe 6 lektione und alli am stuck. aber sust ischs immerno zimli locker. au vom stoff her ischs bisher viel eifacher als in züri.
die wuchä hani leider mis velo müssä zrug gä. dä kuba isch us prag zrug cho. ha bis jetzt no keis neus gfunde, aber bi mir nüm so sicher obi no eis wott, wills inzwüsche doch recht kühl worde isch.
i oisem korridor isch langsam aber sicher lebe ikehrt. dä pedro, en spanier wo neu da wohnt und sis zimmer direkt nebed dä chuchi het, het sini zimmertür immer offe und luti musig a, womit viel me lüt id kuchi chömed, wills sgfühl hend es seg öpis los. so laht sichs guet da lebe. min türkische kolleg koray het isch au langsm chli gmacht. er kocht jetzt sogar ab und zue und wäscht vo zit zu zit ab:-)! usserdem glaubi ischer mängisch so komisch, willer eifach nöd guet englisch chan. mir hend zumindest immer öpis zlache wenn er id chuchi chunt. morn chochemer wieder all zäme. nachdem ich letzt mäntig rösti gmacht han, isch dasmal dä ungar andras dra.
so jetzt musi no dä letzt ufsatz für morn schriebe.
liebi grüäss und nuku hyvin us turku
simone

Fotos vom Cottageweekend und em Röstiesse

hüt hani mit mine mitbewohner und dä irene rösti mit speck und spiegelei kochet. isch serstmal chli läbe id kuchi cho. all sind begeisteret gsi vodä rösti. ich au:-)! ha das ja i mim lebe no nie selber gmacht. (bütelrösti zählt nöd). min türkische nachbar koray het nur dnase grümpft, aber dä zählt au nöd:-)!







oises cottage


s'meer vor oisem cottage




dä postelauf am namittag












schwiizer schoggi für d'emeline nach dä sauna


so ä komischi überlebensgrossi fläsche vor oisem cottage. drin versteckt sich ä lustigi finnin, wo au däbi gsi isch


zwei vo ungefähr 10-20 usere riise gruppe vo spanie wo immer zäme isch

Cottage Weekend

Hallo zäme
das wuchänänd hemer oises cottage weekend gha. 90 ustuschstudente i ca 5 grosse cottages adä ostsee. isch super gsi!! am samstig simer am 10i losgfahre und nach ca 40 minute im camp bi sauvo (oder so ähnlich:-)) acho. swetter isch super gsi und mir hend zerst so paar kennelern spiele gmacht zum gse, wie viel lüt vo welne länder chömed (ja ich bi natürli wieder die einzig usdä schwiz gsi...). kulinarisch simer nöd grad verwöhnt worde. es het verkochte teigwahreuflauf vom feinste und denn erst no viel zwenig dävo gä, so dasmer nacher fast verhungeret sind und oisi chips womer für dä abig kauft hend, scho vor em namittag killt hend. denn simer i zufälligi 6-7er teams iteilt worde und hend so en postelauf mit typische finnische spieli müssä mache. das isch würklich amüsant gsi. es isch gange vo gummi-stiefel-wiitwurf, über finnischi lebensmittel blind erkenne, so öpis wie baseball, so öpis wie bowling oder z.b. hemer au no müssä en finnische volkstanz istudiere zumne alte finnische schlager. oises team het nöd gunä, aber mir hend glaub öpä am meiste spass gha.
spöter hend es paar chönä go ruedere ufem meer. aber es het nöd viel plätz gha und sie sind au nur ca 20 m usä, so dasi gfunde ha, ich muss nöd unbedingt, ich weiss ja wies imne ruederbötli usgseht:-)!
nachem grausame znacht (so öpis wie risotto und undefinierbari gmüäs und früchtstückli) simer immerno hungrig id sauna. die isch i oisem cottage gsi und nur ca 50-100m vom meer entfernt. ich bi ja kein fan vo saunas, aber das isch würkli super gsi!! ich bi am afang inä, wos nonig ganz so heiss gsi isch und denn simer direkt vodä sauna is meer grennt!
spöter hets denn ä party im spiessaal gä. ohni schueh und idä socke. isch drum würkli lustig gsi und d'emeline und justine hets beid öpä 5 mal umgrührt, aber abgse vo es paar blaue flecke hets ihnä nüt gmacht. ha au no neui finnine kenneglernt. die wo das ganze organisiert het. mit däne ischs au sehr lustig gsi!! usserdem hani öpä 10 neui französInne und spanierInne kenneglernt und ha mir nur öpä dhälfti vo dä näme chönä merke, aber es isch es gaudi gsi.
mir hend bis am morge am 5i durätanzt und nach 4 stund schlaf wieder müssä ufsta und s'cottage putze. am 1 simer denn scho wieder zrug in turku gsi, woni als ersts spaghetti kochet ha. extra al dente, willi gneug vo verkochtete teigware gha ha:-)! am abig simer no es fürwerk go luege will turku-day gsi isch. das isch aber eher unspektakulär gsi und ohni musig.
hüt bini immerno chli müäd, aber es het sich glohnt. nächst fritig-samstig gani mit 12 anderne uf helsinki als internationale filmfestival und übernächstwuchänänd gahts ab uf st.petersburg!
hüt abig versuechi mi serst mal i mim lebe a rösti. ha bis jetzt ja nur bütelrösti i mim kochrepertoire gha, aber ich hoff ich schaff das.
liebi grüäss usem herbstliche turku
simone

d'Welt isch es Dorf

Hallo zäme!
die wuchä isch wie im flug vergange. ha dä erst finnisch test erfolgrich hinter mich bracht und s'erste seminar gha imne andere fach. usserdem het jetzt en online-kurs gstartet, womit ich chli meh los han.
gester isch da in turku s'traditionelle ruder-renne zwüsche dä 3 universitäte gsi. ufem aura fluss. mir sind go luege und hend däbi s'erstmal so richtig afange frühre. langsam aber sicher wirds herbst da obe! d'uni turku het mit öpä 500 meter abstand gwunnä. isch also nöd spannend gsi. däfür hemer jensti werbegschenk übercho. s'beste dävo sind gratis tickets für es ishockeyspiel am nächste zistig da in turku idä iishalle:-)! sie hend mi denn gfrögt obi serst mal anen match ga und ich ha gseit, dasi woni chli gsi bin, paarmal gange bin idä schwiz. ooooh switzerland??? which team?? äh sorry für all wos nöd gwüsst hend - Lugano. ooooohhhh you know numelin?!!! sie sind so begeisteret gsi, will dä vo turku chämi, dass sie mir grad öpä 7 billet gä hend:-)!
kurz vor dem rueder-renne simer über dä märtplatz gloffe und weri gsehni det?? dä flavio. er het geographie in züri 1-2 jahrgäng obe a mir studiert! ich has fast nöd chönä glaube! er het ä fründin da und wohnt jetzt drum in turku sit paar mönet. isch komisch gsi schwizerdütsch zrede. aber lustig. ich ga denn mal ufen kafi mit ihm.
morn isch s'cottageweekend. das wird sicher astrengend.. und die wuchä hani usserdem än usflug uf st.petersburg buechet. 8.-11.10.! freumi jetzt scho, wird sicher interessant!
so jetzt muesi go zmittagesse. ga hüt namittag mit dä irene und ihrer schwöster id ikea. bruch dringend kuchi-utensilie, damiti mal richtig cha koche und bache.
schöns wuchänänd und bis bald
simone