Dritti Wuchä in Turku

Moi usem norde!
die wuchä ischs chli ruhiger gsi da obä. Fast scho chli langwilig. Für viel vo mine kollege het d'uni scho agfange. ich ha erst finnisch kurs und ä anderi vorlesig gha, wobi ich die ander scho gstriche ha und dur ä interessanteri ersetzt ha, wo umdä 20. September afangt. Drum hani nonig so viel ztue im moment. wills uf oisem stock immerno ruhig isch, ischs chli öd gsi.
am mittwuch isch die 3. welcomeparty gsi. im klubi. ich glaub das isch jetzt definitiv die letzt gsi:-)! mir hend wieder zerst ä kitchenparty i oisem hus, aber dasmal im stock unä dra gmacht - zum glück! es isch nämli nacher es riise chaos gsi, will öpä 30 lüt i däre einte chuchi gsi sind:-). nacher simer in klubi. d'irene isch au wieder mitcho. es isch dasmal chli zu voll gsi. fast scho en vorgschmack uf d'sauna, woni immer nonig probiert ha:-)! drum sind denn viel lüt, inkl ich die meist zit dussä anstatt dinä gsi. d'irene und ich sind inzwüsche scho gueti fründinne worde. isch agnehm öper da zkenne, womer nöd nur dauernd smalltalk muss halte, was mit dä zit chli astrengend wird.
mis velo hani immero. no bis am 23.9. am 22. isch ä polizeiauktion und ich hoff ich find det es billigs eiges velo, wo au so cool usgseht, aber wo dketti nöd so schnell usägheit:-). s'velo vom kuba het mich glaub gern übercho. es isch jedefalls nie me kaputt gange. aber das au nur, will ich meistens im schritttempo fahre und teils bidä randstei sogar abstiege!
oise gang isch wie gseit immerno usgstorbe. aber ha jetzt usägfunde, dass no ä netti südafrikanerin da wohnt. sie isch eifach fast nie da, will sie d'kuchi gruset. s'gliche gilt für en spanier - ah nei sorry, en bask. es het recht viel ustuschstudente vom baskeland da. die bezeichnet sich nöd als spanier und sehr stolz uf ihres land wie ich usägfunde han:-)! dä türk wohnt au immerno da, aber ich probier ihn z'ignoriere, sowit das möglich isch! ich ha die wuchä no ä kanadierin kenneglernt wo au im studenteheim wohnt und niemer uf ihrem stock kennt, will bi ihre nur dütschi und spanier wohned wo nie englisch mit ihre redet. mit ihre kochi jetzt ab und zue znacht, so dasi nöd immer bim manu oder henning muss go klopfe weni nöd älläi wott esse. morn abig hemer es chlises treffe idä chuchi organisiert. dä manu, henning und ich hend es plakat bastlet und in gang ghänkt und hoffed das all chömäd, damit da mal chli lebe id budä chunt.
gester bin mit dä kanadierin (cassia) uf rauma. das isch ä chlini stadt chli nördlich vo turku. sie ghört zum unesco weltkulturerbe und hät die grösst erhalteni, zämehängendi altstadt vo ganz skandinavie. da gits also no die schönä, typische skandinavische holzhüser, wo definitiv meh charme hend als die viele beton-neubaute in turku:-)! es het mir sehr guet gfalle. interessant isch au dä dialekt wos in rauma reded. finnisch isch ja scho ä eigenartigi sprach, aber rauma toppt also das finnisch woni vo turku her kenne:-)!
langsam wirds kühler da obe. am tag, wenn d'sunä schint ischs fast no t-shirt wetter, aber am abig und am morge ischs um 6-8 grad. zum glück chani am morge immer usschlafe und muss nöd id kälti. ich freumi aber uf dä herbst, wenn d'blätter adä bäum farbig werded.
nächst wuchänend isch das erasmus-cottage-weekend woni mit 89 anderne ustuschstudente hi ga. ich bi däfür extra am mittwuch am 6.50 go asta für es billet. bi die 20. gsi wo eis übercho het, het also lüt gha wo no frühner det gsi sind. und viel hend keis ticket me übercho.
nachdemi die wuchä chli en durchhänger gha ha, bini zuversichtlich, dases ab morn wieder berguf gaht. die wuchä fangt au en online-kurs a, woni belegge und denn hani wieder chli meh program!
ganz liebi grüäss usem norde und nuku hyvin
simone

ich liebe mini mitbewohner... oder mis lebe im irrehus

hallöle!

ha ja scho ghört, dass inzwüsche oise korridor fast voll isch, aber ich ha erst ei mal ä südafrikanerin kurz gse (wo ganz normal und nett wirkt) und ä amerikanerin im gang, wo mir nöd hoi gseit het und anschinend am manu verzellt het, dass sie depresiv isch wo selbstgspröch macht... hüt hani jez zerst en tschech troffe, wo praktisch keis wort englisch chan und nödmal verstaht wemer ihn nach sim name frögt. chli spöter, woni grad mit manu und hennig am hörnliuflauf esse gsi bin (was übrigens sehr guet acho isch, obwohl die das no nie gässe hend unds da nur so grusige komische chäs git), denn isch jedefalls en türk inä cho, wo sit paar täg da wohnt. vo dem hani ja au scho vom henning ghört. aber da dä henning, wo kei ironie verstaht, ja auch chli en fall für sich isch, hani dänkt, dä türk wird wohl nöd so schlimm si. er het mir nur verzellt, dass dä türk ihn gfrögt het wie mär hamburger kocht, was ich jez nöd sooo schlimm gfunde han. dä henning findets au komisch, wemer i oisere kuchi idä trainerhose umälauft... aber jedefalls het dä türk würkli en hau ab! dä manu het ihn gfrögt, wie er heisst und her het mega schnell und undütlich öpis gseit. denn het dä manu gseit: "koba"? dä türk: "noooooo ko..." ich: "kora?". denn ischer fast usgflippt. au nacher ischer immer grad agro worde, wenn öper öpis nöd verstande het (und sis englisch isch würkli nöd guet). denn hemer dessert gässe wo dä manu bracht het. pudding und joghurt hets zur uswahl gha. und er het eifach es gno ohni gross zfröge und nödmal danke gseit und isch denn au no wählerisch gsi und het gfunde es seg nöd fein. halloooo???
nacher bini i mis zimmer und woni wieder usä cho bin ischer so komisch ufem gang umä gschliche. dä henning het mir spöter gseit, dass sie ihm gseit heged, er söll sis zügs amigs bitte abwäsche, will er ALLES sta laht, au kafitasse und so und er laht immer dä herd und kafimaschine a. jedefalls heter denn gfunde er putzi sis züg nöd "we have the girls for that". HALLLOOOO??? HUUUPÄTS:-)???
ich wart scho druf, dasi mit däm mini erste diskussione han. so agro wie dä scho wird wemer sin name falsch usspricht cha das ja heiter werde...
ich glaub ich bi im irrehus glandet!!! bi ja scho gspannt uf die restliche 4-5 mitbewohner... aber dä türk chönds glaub nöd toppe. sin name weisi immer nonig, aber fröge getrau ich mich nüm;-)!
guet nacht
simone

meh Föteli

Mis vorübergehende Velo!


Usflug nach Naantali





Ich und Irene, mini Tutorin


s'Resultat vo dä Irene ihrne Tanzkünst. Das Föteli isch denn ä Wuchä spöter ufgno, also chamer sich glaub fast nöd vorstelle, wie sie das gschafft het, wemers nöd gse selber gse het:-)

Ersts Konzert im Klubi

Gester bini mit zwei vo mine Nachbare und paar andere Erasmus-Studente anes Konzert vonere finnische Rockband us Turku mitem Name Magneta Skycode. Als Vorband het so en finnische Sänger, wo glaub eher en Comedian als en Sänger gsi isch, und au scho paar Bier intus gha het, gspielt. Ich ha mal probiert Videos ufäzlade. Aber bi nöd sicher obs funktioniert. Irgendwenn musi denn glaub mal no an es Heavy-Metal Konzert da in Finnland, will die Art vo Musig da obe ja recht beliebt isch, aber für dä Afang hani dänk, probieris mal mit öpis harmloserem:-).

Zweiti Wuchä in Finnland

Hallöchen!

Scho zwei Wuchä bini jez in Finnland. D'Uni het immer nonig agfange. Morn hani s'erst mal dä Finnisch Kurs aber sust fanged mini Vorlesige erst i 1-2 Wuchä oder no spöter a.
Es gfallt mir immerno super da. Will mir no kei Uni hend, hemer nöd so viel z'tue und gönd däfür umso meh in Usgang. Die andere sind ja all viel jünger und ich bi glaub die einzig, wo jetzt langsam ä Pause brucht:-)!

Ich ha jetzt endli es Velo. Nur für 2-3 Wuchä, aber immerhin. Has vom Kuba (Tschech) übercho, will er für Prüfige zrug uf Prag het müssä und öper gsuecht het zums Velo babysitte, will da d'Velos zimli schnell klaut werded, wemers umä sta laht. Has au scho ustestet zum in Usgang ga. Leider gheit d'Ketti all paar 100 Meter usä, wemer nöd im Schnecketempo fahrt, aber es isch besser als nüt und es gseht suuuper cool us:-)!

Am Dunstig simer s'erst mal is Onnela, das isch en Club im Zentrum vo Turku wo über zwei Stöck gaht und no ä grossi Ussä-Bar het. Da in Finnland isch ja s'Rauche nur dussä erlaubt, was würkli sehr agnehm isch. Däfür ischs je spöter dä abig, desto lüüter dussä.
Gester bin ich s'erst mal amne Samstig Abig in Turku unterwegs gsi und ich glaub ich ha i mim Lebe no nie so viel betrunkeni Lüt uf eim Huufe gse. Die einte hend nüm chönä sta und sind am Bode glege, die andere sind idä Underhose umä grennt oder hend umägröölet. Isch jedefalls interessant und amüsant gsi:-)! Teilwis ischs aber au eher chli tragisch was mär so gseht. So ischs da eigentli normal, dasmer am Wuchänänd scho am Mittag betrunkeni Teenies idä ganze Stadt gseht umälungere. Die probiered nödmal, das als Picknick ztarne, aber ich glaub nöd dass es die restliche Finne interessiert. Ich bi mit zwei vo mine Nachbare gester und paar anderne Ustuschstudente anes Konzert im Klubi (schönä Name für en Club:-)). Ä finnischi Band het gspielt. Isch super gsi! D'Vorband isch au lustig gsi. So en finnische Entertainer wo mir leider nöd verstande hend, aber wo irgend welchi Liedli gsunge het uf finnisch und so Engels-Flügeli agha het. Mir hend zwar keis Wort verstande, aber es isch lustig gsi. Ha denn au no dä erst Schwiizer troffe sit ich da bin. Inere Chuchi i oisem Nachbarhus. Ich hans fast nöd chönä glaube, dass ich doch no öper triff wo Schwizerdütsch redet und es isch recht komisch gsi, mal nöd englisch oder dütsch zrede.

Gester simer au no inere Stadt chli nördlich vo Turku gsi. Naantali. Isch vor allem berühmt für dä Mumins-Park. Dä hetti 20 Euros kostet, drum simer eifach det an Strand und d'Altstadt go aluege. Es isch schön gsi, aber sehr touristisch gsi und vor allem simer mit öpä 15 Lüt unterwegs gsi, was mit dä Zit ä chli astrenged worde isch. Mir sind au wieder amne Strand gsi det, aber das mal bin ich nöd go bade.

Hüt gani no zudä Irene mit ihre und ihrne Kollege go Film luege. Sie isch au wieder mit ois in Usgang cho am Dunstig und sie isch eifach die best. Han also würkli Glück gha, dasi sie als Tutorin ha. Die meiste andere hend so typischi, verschlossni und ruhigi Finnine, wo jetzt eigentli kei Kontakt me zu ihne sueched. Ohne d'Irene würdi wahrschinli au chum Finne kennelerne.
I oisem Stock wohned irgendwie immer nonig meh Lüt. D.h. ich ha vom Manu, mim direkte Nachbar ghört, dass en Tschech, en Türk, en Spanier, ä Südafrikanerin und ä Amerikanerin izoge sind, aber gse han ich die no nie. Mir glaubed aber langsam, dass irgendöper vo däne das riese Puff idä Chuchi verastaltet. Es isch würkli chli grenzwertig, will die dreckige Pfanne und Teller glaub bald afanged lebe und selber us dä Chuchi dävo laufed:-). ich choch drum eher selte da und iss am Abig immer nur Chäsbrötli oder sust öpis kalts.

Ich freu mi scho uf dä Finnisch-Kurs morn. Bis jetzt chan ich ja nur Hallo, Tschüss, Danke und paar Schimpfwörter vo dä Irene.
Ich probier mal no es Filmli vo dem komische finnische Entertainer vo gester ufä zlade, aber bezwiefle, dass ich das schaffe:-)!

Hei hei us Turku!

Die spinnen die Finnen

also d'finne sind scho es völkli für sich. ich gse und ghör da immer wieder sache, womer sich nur cha an kopf lange:

• - in finnland isch es sit kurzem verbote idä öffentlichkeit alkohol zkonsumiere. verständlicherwis:-)! aber wenn mär bimne picknick isch, denn isch dä alkohol idä öffentlichkeit immerno erlaubt, was däzu führt, dass mär eifach immer es brötli oder schoggistänglei däbi ha sött, wemer imne park sitzt und sin wodka trinkt, will denn ischs nämli es picknick und nöd es sauf-gelage:-)!

• -in turku erkennt mär die meiste studente sofort a somne komische overall bzw so arbeiter-überhose. die hend verschiedni farbe, en furchtbare schnitt (gross und unförmig) und ganz viel abzeiche druf gnäht. mini tutorin het mir erklärt, dass jedes departement adä uni ä anderi farb vo hose het. geographe hend z.b. grüäni. a jedere party oder a andere aläss vodä uni chunt mär denn so abzeiche über wo mär cha druf nähe. däfür dass sie mini tutorin isch het sie zum bispiel au eis übercho. sie het gseit sie het die hose nie a und keis einzigs abzeiche druf gnäht, aber ich glaub d'irene und ihri kollege sind da d'usnahm will die ganz stadt (nöd nur s'uniquartier) voll isch vo dem modische highlight!

• -won ich letzt dunstig abig öpä am 8i vor dä kathedrale gsesse bin, isch dä park voll gsi vonere horde stockbetrukene junge finne. mer het sie scho vo witem ghört jole und öpä 10 vo ihne sind fast nackt idä underhose umägrennt und hend hysterisch umä kreischt.

• in finnland isch es tradition, dass die neue studente i ihrer erste wuchä adä uni so en art postelauf finnischer art münd absolviere. sie werded i teams iteilt und münd ufgabe erledige. also mehrheitlich münds alles mögliche züg trinke. oder z.b sötteds die längst kleiderketti vo dä welt mache, was dämit endet, dass sie nacher all im adamskostüm dur dgegend laufed. öb das denn au als also es "picknick" durägaht, weiss ich allerdings nöd.

• -d'technik isch da so wit fortgschritte, dass mär d'wöschmaschine im studenteheim muss via telefon-aruef starte. usserdem isch dwöschmaschine glaub uf finnisch agschriebe, sowit ich ghört ha. freu mi drum scho extrem uf die erst wösch und ha chli angst um mini chleider. aber morn oder übermorn mussi wohl, will mir langsam dkleider usgönd:-).