Vorwiehnachtszit in Turku

Inzwüsche hani mini finnischprüfig endli hinter mich bracht und muss jetzt no paar chlineri sache abä, aber cha afange mich uf wiehnachte freue. dank dä dunkelheit fühl ich mich scho sit paar wuchä fast in wiehnachtsstimmig. am fritig bini mit dä justine ufem finnlandwit grösste oder berühmteste wiehnahtsmärt gsi. dä isch in turku will turku d'wiehnachtsstadt vo finnland isch. warum gnau, hemer allerdings nöd usägfunde, will dä märt öpä so us 20-30 winzige ständ bestaht und würkli nöd gross isch. i 5 minute hemer öpä alles gse und probiert wos zprobiere gä het (da d'justine ä wahri fressmaschine isch, hemer au nüt usgla:-)). usserdem hemer dä grössti christbaum vor dä kathedrale agluegt, wo aber det nöd so gross usgseht, will d'kathedrale eifach viel grösser isch als dä baum.




nachdem dä wiehnachtszauber vo turku also chli enttüschend gsi isch, isch däfür denn mis gritibänze backe am 6. und für mini mitbewohner am 7.12. en volle erfolg gsi. am suntig hani 7 chlini gmacht und verschänkt und am mäntig no zwei grossi a je 500g . die sind super guet acho und ich muss säge ich has au gnosse mal wieder öpis feins zässä:-)! oisi schwizer gritibänz-tradition het jez also mindestens 10-12 fans me weltwit...



und us luter vorfreud uf wiehnacht mit minere familie hani denn au no es schöns filmli gmacht für dä 24.dezember mit mami,meme,hanspeter und schwösterherzli. vor allem dä hanspeter wirkt uf mich also sehr authentisch:-)! klicked uf dä folgendi link oder wenn das nöd gaht tüend ihn eifach kopiere und denn ifüäge:

http://elfyourself.jibjab.com/view/OA6AFzqBtI1Vimpx?cmpid=ey_fb_friend

alternativ hani no eis mit mine 4 lieblings-mitbewohner tanzend im schnee. au sehr schön:

http://elfyourself.jibjab.com/view/Bb78DLrJc2QPt4dG?cmpid=ey_fb_friend

ich freumi weni oi denn i 2 wuchä au in natura wieder gse und nöd nur im video als zwärgli!
ganz liebi grüäss usem wiehnachtliche turku
simone

dä afang vom winter

hoi zäme
wie ich ghört ha hets bi oi scho richtig gschneit. bi wotts leider immer nonig so richtig. bis gester isch immerno zimli warm gsi mit 5-7 grad. usserdem fast immer schlechts wetter sit mitti oktober. mir hend d'sunä vilicht zwei mal 1 ganze tag gse und sust so 1-2 mal pro wuchä 1-2 stündli... mängisch wuchälang gar nöd. hüt bini drum richtig happy gsi woni verwachet bin und gmerkt ha, dass es richtig hell isch dussä. strahlend blaue himmel, keis wülkli und iiisig kalti -6 grad am mittag am 11i. aber das isch mir denn egal gsi. hauptsach wiedermal chli sunä und dussä isch alles gfrohre gsi. bäum, gras, blätter, beeri... nach mim finnisch kurs (dä letzt übrigens, jez musi nur no am mäntig prüfig schribe und denn "moi moi" finnisch) bini denn drum chli go spaziere und ha no d'Ela, ä dütschi troffe und mir sind 1.5 stund dussä gsi. en perfekte wintertag!!! hoffe dä schnee chunt au no vor wiehnachte und sust denn sicher im janaur.
i weniger als 3 wuchä chumi scho wieder hei. d'ziit rast und die erste reised scho die, oder die nächst wuch ab. drum heissts leider langsam abschied nä vodä erste wo nur 1 semester blibed. ich bi froh hani verlängeret und chani nomal zrug cho für 2 mönet. finnischi nebelsuppe hi oder her:-)!
liebi grüäss und nuku hyvin

us mim fenster gester


und us mim fenster hüt





spaziergang am 14.20

November in Turku und Riga

moika!
länger ischs her sit mim letzte itrag. d'zit vergaht immerno wie im flug. Nachdemi afang november äs chlises zwüschetüüf gha ha mit dä immer extremere dunkelheit, hani mi jez langsam aklimatisiert. d'sunä gaht immer frühner unter. hüt am am 15.44! das heisst abem zwei fangts a dünkler werde und am 16.15 isch stockdunkel... schnee hemer nonig würkli. es het zwar eimal gschneit, isch denn aber nöd liggeblibe.
inzwüsche hani au würkli viel für d'uni ztue. meh als in züri sogar. ich ha zwar kei prüfige aber muss jede menge essays und kurz-ufsätz online abgä für die zwei kürs im internet. nächst wuchä fangt no en neue "richtige" kurs adä uni a. ich hoff dä git nöd no me ztue, will ich scho gar nüm weiss wenn ich das alles söll mache.
mit dä partys hets chli nagla. meistens gits 1 mal pro wuchä öpis, mängisch au gar nie. Aber das isch guet so. bi däre kälti und dunkelheit hani sowieso kei lust zum usäga. mir sind däfür jez meh all zäme idä chuchi.
letzt wuchä bini mit dä cova (spanie) und marine (frankrich) in riga gsi. ich bi ja letzt jahr scho det gsi im summer und au im winter hets mir jez wieder sehr guet gfalle au wenns ganz anders gsi isch, will total usgstorbe am afang. am 2. und dritte tag hets denn plötzli viel lüt gha und wo denn am mittwuch all läde zue gha het hemer au gwüsst warum. es isch dä unabhängigkeitstag vo lettland gsi und d'lüüt sind id stadt gströmt! sie hend blueme am bodä anägleit und am abig hend sie sich vorem dom um chlini füür versammlet.
oises hostel isch ä katastrophe gsi. öpis anders isch aber für 5 euro pro nacht au nöd zerwarte. aber mir sind ussert einere frau wo det wohnt die einzige im 16er zimmer gsi und hend drum glück gha. dä flug isch au es erlebnis für sich gsi. ryanair für 2 euro... will d'cova ihri ID nach dä sicherheitskontrolle im flughafe verlore het, hend sie sie denn mit ihrem studenteuswis flüge la, was ich nöd sonderlich vertrauenswürdig finde. aber mir sind froh gsi, hemer überhaupt hei chönä:-)!
letzt wuchä bini au no mit esn (organisation für ustuschstudente) uf helsinki. mir sind id schoggifabrik und is parlament. d'schoggifabrik isch chli enttüschend gsi obwohl die finnisch schoggi nöd schlecht isch, will sie en schwizer immigrant erfunde het aber s'parlament isch interessant gsi.
gester het ä französin woni nöd so guet kenn ihre geburtstag gfiiret zum thema 80er und 90er und mir hend ois wiedermal all verkleidet. isch sehr amüsant gsi und ich glaub mir hend wiedermal die beste kostüm gha.
jez gahts nur no 4 wuchä und denn chumi wieder hei. ich freumi scho meeega, aber ich bi au chli trurig, will die einte ja nur es semester blibed und denn nach wiehnachte nüm da sind. i oisem gang wirds recht ruhig werde wenn dä andras (ungar) nüm da isch, will er mit eme andere ungar und äre ungarin undme spanier immer bi ois idä chuchi isch.
aber ich freu mich oi gli wieder zgse!!!
Liebi grüäss usdä dunkelheit
simone



mit 3 vo mine mitbewohner

Bsuech us dä Schwiz

hyvää iltaa!
das wuchänänd ischs endli sowit gsi und isa, christina und stebi sind mich in turku go bsueche.
am dunstigabig sinds acho, gnau richtig für die grösst bisherig kitchenparty im student village. die het im 12A i oisem nachbarhus stattgfunde und isch so voll und lut gsi, dass dpolizei 3 mal het müssä cho und die wo det wohned jetzt zimli problem mitem housing office hend.
am fritig hemer sightseeing gmacht (so viel gits ja nöd gse, so dass das nur 1-2 stündli zfuess duret het), denn simer i mis lieblingskafi mitem beste schoggichueche go zvieri esse und am abig hemer bi mir dihei koched. dä flavio wo in züri gg studiert het und jez da mit sindere fründin wohnt isch verbi cho und mir hend hörnliuflauf kochet und tere und manu hend spanischi tortilla gmacht. isch en gmüätliche abig gsi.
am samstig simer denn no uf ruissalo, d'insle idä nöchi. die isch sehr schön im moment, mit allne farbige blätter! am abig simer denn uf d'fähre nach stockholm.
det het sich dä stebi denn als einzige unters partyvolk gmischt, woruf mir ihn dä nächsti tag hend dörfe babysitte, willer nur ca 30 minute gschlafe het und dä alkohol nonig so würkli verdunstet gsi isch, womer in stockholm acho sind.
am 7i am morge simer denn scho idä stadt gsi und hend s'schönä morgeliecht und dä sunäufgang gnosse. leider simer nacher mega müäd worde und wills spöter die ganz zit gregnet het, hemers nöd so chönä gnüssä. aber es isch glich lässig gsi.
am abig sind denn stebi und christina id jugi, wills vo stockholm hei gfloge sind und d'isa und ich sind wieder ufs schiff. nachdem mir ufem hiweg ä kabine im unterste deck, unter allne autos und lastwäge und unter dä wasseroberflächi gha hend, wo halbs am usänand gheie und lut gsi sich, hemer ufem heiweg glück gha und ä kabine vodä beste kategorie zuteilt übercho mit bulaug und meersicht. das isch es wahrs highlight gsi:-)!
am mäntig mittag isch denn au d'isa wieder hei. die 3-4 täg sind super gsi!!! ha scho lang nüm so viel glachet und mir hend viel erlebt und ich ha endli wiedermal chönä schwizerdütsch rede.
mis zimmer chunt mir jez chli leer vor (wo sie da gsi sind, ischs au würkli voll gsi) aber es wird mir au jetzt nöd langwilig. adä uni hani recht viel ztue für zwei online-kürs und sött au für anderi vorlesige no arbeite schribe idä nächste 3 wuchä. wie ich das alles söll schaffe isch mir äs rätsel, aber da s'niveau da nöd so höch isch, wirds scho klappe.
usserdem bini bis jetzt sehr erfolgrich. bi dä zwei sache woni scho bscheid ha, hani beidi mal die höchst note übercho, und das mit minimalem ufwand:-)!
dä herbst da obä gaht langsam aber sicher verbi. ich glaub das ischs letzt wuchänänd mit blätter adä bäum gsi. jetzt wirds winter. sit dä zitverschiebig wirds au früh dunkel. hüt woni am 4i am namittag dussä gsi bi, isch scho d'sunä am unterga gsi. ganz dunä isch sie hüt offiziell also scho am 16.28 gsi. es wird au langsam wieder kälter, nachdem mär däzwüsche nomal mehrmals 7-9 grad gha hend. ich freumi scho uf dä erst richtig schnee. am fritig hets mal kurz chli gschneielet, aber nur für 5-10 minute und liggeblibe isch natürli nüt.
jetzt tueni no chli finnisch lerne und denn gahts ab is bett. ha immerno chli schlafmangel vom wuchänänd.
liebi grüäss usem langsam dunkle finnland
simone