Bsuech us dä Schwiz

hyvää iltaa!
das wuchänänd ischs endli sowit gsi und isa, christina und stebi sind mich in turku go bsueche.
am dunstigabig sinds acho, gnau richtig für die grösst bisherig kitchenparty im student village. die het im 12A i oisem nachbarhus stattgfunde und isch so voll und lut gsi, dass dpolizei 3 mal het müssä cho und die wo det wohned jetzt zimli problem mitem housing office hend.
am fritig hemer sightseeing gmacht (so viel gits ja nöd gse, so dass das nur 1-2 stündli zfuess duret het), denn simer i mis lieblingskafi mitem beste schoggichueche go zvieri esse und am abig hemer bi mir dihei koched. dä flavio wo in züri gg studiert het und jez da mit sindere fründin wohnt isch verbi cho und mir hend hörnliuflauf kochet und tere und manu hend spanischi tortilla gmacht. isch en gmüätliche abig gsi.
am samstig simer denn no uf ruissalo, d'insle idä nöchi. die isch sehr schön im moment, mit allne farbige blätter! am abig simer denn uf d'fähre nach stockholm.
det het sich dä stebi denn als einzige unters partyvolk gmischt, woruf mir ihn dä nächsti tag hend dörfe babysitte, willer nur ca 30 minute gschlafe het und dä alkohol nonig so würkli verdunstet gsi isch, womer in stockholm acho sind.
am 7i am morge simer denn scho idä stadt gsi und hend s'schönä morgeliecht und dä sunäufgang gnosse. leider simer nacher mega müäd worde und wills spöter die ganz zit gregnet het, hemers nöd so chönä gnüssä. aber es isch glich lässig gsi.
am abig sind denn stebi und christina id jugi, wills vo stockholm hei gfloge sind und d'isa und ich sind wieder ufs schiff. nachdem mir ufem hiweg ä kabine im unterste deck, unter allne autos und lastwäge und unter dä wasseroberflächi gha hend, wo halbs am usänand gheie und lut gsi sich, hemer ufem heiweg glück gha und ä kabine vodä beste kategorie zuteilt übercho mit bulaug und meersicht. das isch es wahrs highlight gsi:-)!
am mäntig mittag isch denn au d'isa wieder hei. die 3-4 täg sind super gsi!!! ha scho lang nüm so viel glachet und mir hend viel erlebt und ich ha endli wiedermal chönä schwizerdütsch rede.
mis zimmer chunt mir jez chli leer vor (wo sie da gsi sind, ischs au würkli voll gsi) aber es wird mir au jetzt nöd langwilig. adä uni hani recht viel ztue für zwei online-kürs und sött au für anderi vorlesige no arbeite schribe idä nächste 3 wuchä. wie ich das alles söll schaffe isch mir äs rätsel, aber da s'niveau da nöd so höch isch, wirds scho klappe.
usserdem bini bis jetzt sehr erfolgrich. bi dä zwei sache woni scho bscheid ha, hani beidi mal die höchst note übercho, und das mit minimalem ufwand:-)!
dä herbst da obä gaht langsam aber sicher verbi. ich glaub das ischs letzt wuchänänd mit blätter adä bäum gsi. jetzt wirds winter. sit dä zitverschiebig wirds au früh dunkel. hüt woni am 4i am namittag dussä gsi bi, isch scho d'sunä am unterga gsi. ganz dunä isch sie hüt offiziell also scho am 16.28 gsi. es wird au langsam wieder kälter, nachdem mär däzwüsche nomal mehrmals 7-9 grad gha hend. ich freumi scho uf dä erst richtig schnee. am fritig hets mal kurz chli gschneielet, aber nur für 5-10 minute und liggeblibe isch natürli nüt.
jetzt tueni no chli finnisch lerne und denn gahts ab is bett. ha immerno chli schlafmangel vom wuchänänd.
liebi grüäss usem langsam dunkle finnland
simone

Stockholm Oktober

hallo!
d'ziit vergaht wie im flug da obä. es gfallt mir immerno bestens, au weni im moment chli kaputt bin, will ich inzwüsche doch recht viel für d'uni ztue han. aber es isch interessant und ä gueti abwechslig mal chli s'hirni zbruche:-)!
das wuchänänd bini mit dä justine, emeline und cassia uf stockholm.
d'überfahrt mit dä fähre isch es erlebnis für sich. d'fähre isch riesig und het discos, sauna, kino und vor allem en duty-free supermärt. chum dass die guete finne s'schiff betrete hend, sinds au scho in shop gstürmt und hend d'alk-abteilig plünderet. ich glaub sie hend denn ufem schiff öpä gnau so viel trunke, wie denn au usä gno hend. nach paar stund sind öpä 3/4 vodä reisende stockbsoffe umätrolet. mir sind ois so es "dancing" für älteri lüt go aluege. det hends zu finnischer musig tanzt, aber eigentli sinds nur det gsi, wills zwüschedurä sonderagebot vo billige drinks gä het. cuba libre für 4 euro? da hend sie sich nüm chönä zrug halte und hend dbühni d'bar gstürmt, au wenns so alt gsi sind, dass chum hend chönä laufe. uf dä rückfahrt sinds scho bsoffe gsi bevors ufs boot sind. recht amüsant, aber scho eher tragisch. a karaoke hends denn natürli bsunders freud gha und mir hend ois au amüsiert. nur hets chli weh da idä ohre...
mir hend ois schön brav zrug ghalte, damit mir denn fit gsi sind am fritig für stockholm. die stadt isch eifach wunderschön, sogar wenns 3 täg regnet und bewölkt isch. mir hend bi minere schwedische kollegin maria chli usserhalb vom zentrum chönä wohne und sie isch die best gastgeberin womer sich vorstelle chan. ich hoff sie chunt mi gli da go bsueche, damit ich mich revangiere chan. Am fritig namittag hani d'simone troffe. sie isch ja im ustusch in örebro und drum mit ihrer kollegin für 2 tag uf stockholm cho, zum mich gse. schön gsi es alt bekannts gsicht zgse und endli wiedermal chli ch-dütsch zrede. am abig simer so müäd gsi, dasmer nöd in usgang sind. däfür bini am samstig mit dä cassia as muse konzert. ä englischi rockband. het ois super guet gfalle!! spöter hemer emeline und justine troffe und no en geographie-kolleg vo mir wo in stockholm sin ustusch macht und denn simer ines pub eis go zieh.
mit dä girls hanis super gha! mir hend ois die ganz zit halb tot glacht, will d'justine und emeline mit ihrem französische akzent ein vogel nachem andere abschüssed:-)! ich mach jetzt denn es tandem mit dä justine, damit sie ihres dütsch und ich mis französisch cha uffrische.
stockholm gfallt mir würkli super! weni d'lüt woni kenneglernt ha in turku chönt uf stockholm über-beame, denn würd ich det au gern mis erasmus-semester mache:-)!
nächst wuchänänd gani nomal für 1 tag mit mim bsuech usdä schwiz. freu mi nonig so uf 2 mal 12 stund schifffahrt, aber däfür gsehni no chli meh vo dä stadt.
jetzt musi no zwei täg lang vollgas gä für en online-kurs und denn chömed christina, isa und stebi mich go bsueche!
d'ziit vergaht so schnell da obä... weni wie planet bis im dezember wür blibe, wer jetzt scho über d'hälfti vo mim ufenthalt verbi. aber ich ha ja jetzt bis afang märz verlängeret und chum drum a wiehnacht am 21.12. nur für 3 wuchä hei. freumi jetzt scho oi all wieder zgse und ufs esse freui mi au scho:-)!!!
liebi grüäss usem dank zitverschiebig würkli langsam aber sicher dunkle norde
simone

fotos st.petersburg

St.Petersburg

helloou!
letzt wuchänänd simer jetzt also uf st.petersburg!
nach ca 10-12 stund reis miteme bus (wovo mir 2 stund adä grenze gha hend, will d'russe lüt us bosnie, türkei und iran nöd würkli hend wellä willkomme heisse), simer am dunstig idä russische stadt am finnische meerbusä acho. es isch leider scho abig gsi, aber no hell, so dass mir scho ufem weg zum hotel gse hend, dass die stadt würkli sehr schön isch!
aschlüssend simer is ballett. mir hend schwanesee glueget und es isch sehr idrücklich gsi, au wenn ich leider ä chli müäd gsi bi nach dä bus reis und fast igschlafe bi im mittlere akt.
am fritig sich denn sightseeing miteme bus ufem program gstande. mir hend däbi vieli sehenswürdigkeite abklapperet (zumindest vo ussä) und föteli gmacht. ha i 4 täg fast 500 föteli gmacht, was zeigt, dases mir gfalle het:-)! am abig hemer d'stadt miteme boot erkundet. st.petersburg wird ja au s'venedig vom norde (nebed stockholm) gnennt. das isch zumindest am peter dem grossen sini absicht gsi, woners im 18. jahrhundert het baue la. d'stadt vom wasser us z'erkunde isch nomal öpis ganz anders gsi. würklich sehr schön, au wenn mir leider vom chlöpfmost wo im priis inbegriffe gsi wer nöd viel gse hend;-)! aschlüssend simer go russischi omelette esse imene fastfood restaurant nur für omelette (es paradies für mich:-)). und denn simer in usgang. zerst hemer inä bar wele, wo jede abig neu jahr gfiiret wird (d'russe hend no dä grösser egge ab als d'finne) aber das isch scho voll gsi. drum simer denn inä bar wo baby-bala oder irgend wo öpis gheisse het. det hemer denn dä barbara, mim schwösterherzli, ihre geburi gfiiret. ich ha ja leider nöd chönä mit ihre astosse, will sie am andere end vodä welt isch, aber barbara, mir hend dich usgiebig gfiiret:-)! dä klub isch voll gsi vo ois ustuschstudente und vo russe und russinne wobi mer letzteri adä knappe bekleidig schnell erkennt het. isch sehr amüsant gsi!
nach nur 4 stund schlaf simer am samstig is berühmte Hermitage-Museum. s'gebäude älläi isch en traum! ha det also 1-2 zimmer gse, woni nöd wür nei säge, wenis chönt als mini stubä ha:-)! d'gemälde hend ois eher mittelmässig beidruckt. sind zwar vieli berühmti künstler usgstellt, aber mir hend sgfühl gha, sie hend dä russe die bilder adreht, wo sust niemer het wele zeige:-).
aschlüssend simer uf dä märt, wo es paar vo ois babuschkas oder ähnlichi souvenirs kauft hend und denn i die berühmti uferstehigschliä. am abig simer so k.o gsi, dasmer nur no sind go en tee trinke und für is bett.
am suntig hemer no ä tour zum thema leningrad im 2. weltkrieg gha. det isch d'stadt ja für langi zit vodä dütsche umstellt gsi und fast 1 million lüt sind verhungeret oder verfrohre. d'tour isch sehr spannend gsi und mir sind au dur stadtteil chli usserhalb gfahre und hend die typische, hässliche wohnblöck us sowjetzite gse. däbi simer au am studenteheim vo st.petersburg verbi cho. ich muss säge, da in turku isch alles sehr luxuriös und fast scho ä architektonischi glanzleistig vergliche mit dä russe... am mittag ischs denn scho wieder zrug uf finnland.
die reis isch definitiv dä bisherigi höhepunkt vo mim ufenthalt im norde gsi. eini vodä schönste städt woni je gse ha. hangt viellicht au dämit zäme, dass mir 4 täg sunäschi gha hend, wobis pro jahr nur ca 60 git:-)! ich wird sicher irgendwenn nomal zrug cho. es git no so viel woni nöd gse han. z.b. am peter am grosse sini summerresidenz, diversi museä und chilä... nöd so guet gfalle hend mär d'lüt in russland. sie sind extrem unfründlich und kühl gsi und lache hani glaub keine gse. usserdem sinds nöd hilfsbereit und mär fühlt sich vodä erste sekunde a nöd würkli willkomme. da bevorzugi zum wohne ä unspektakuläri chli-stadt wie turku, mit nette lüt:-)!
i 1.5 wuchä gani uf stockholm mit cassia, emeline und justine und ende monat nomal, wenn mich isa, christina und stebi usä dä schwiz chömed go bsueche! und im november gani no uf riga für sage und schreibe 2 euro retour mitem flugzüg. unglaublich!!! mär chönt meine ich bi nöd zum studiere da;-)! adä uni gahts guet. d'vorlesige sind eifach oder ich ga nöd, will ich z.b. dä indischi professor mit sim akzent sowieso nöd versta unds au selber miteme buech chan lerne...
im moment wartemer sehnsüchtig uf dä schnee:-)! kalt gnueg wers, aber leider ischs immer nur eitel sonnenschein bis jetzt.
durägfrohrni grüäss usem norde
simone
p.s für föteli rechts uf fotos st.petersburg klicke